يا ام رجل المستقبل

 ( الحور العين ) بتقولك عزيزتي يا أم رجل المستقبل عشان تربي راجل بجد يعرف يفتح ببت مش مجرد ذكر للتزاوج :

1- متتكلميش مع ابنك بالزعيق والشخط ..هيبقى صورة منك وهيبقى أسلوب حياته ..وأول واحدة بيتعلم يشخط فيها أنت وتاني واحدة مراته اللي لا حول لها ولا قوة غير بلاها بيه 

2-متضربيش ابنك باديك أو أي حاجة .. بتربيلنا طاقة غضب كامنة جاهزة للانفجار في الخناقات معاك وفي الشارع ومع أهل بيته في أي وقت
3- علميه من صغره "يقولك يا حبيبتي" وكلمة "بحبك "و"وحشتيني"
4-لما يجي عيد او مناسبة حلوة قوليله أنا زي كل الستات بحب الورد ..وافرحي أما يجيبلك ورد ..عشان تعلميه يهادي بالورد ...لقد اصبحت الجملة الطليقة على ألسنة الستات المصريات "مبيجبليش وردة"
5- لما تختلفوا قبل أما تناموا ..روحي اتكلمي معاه بالراحة ضبطي معاه الدنيا ... علميه مينامش وبينه وبين اللي عايشين معاه في البيت خلاف
6- لله وللوطن اعتذري لما تغلطي في حقه وعلميه يعتذر ...لقد سئمنا من بلاء الرجل اللي نفسه عالية الذي لا يعتذر
7- بلاش العتاب واللوم والملامة مع كل غلط على الفاضية والمليانة... خلي فيه مساحة من الخطأ والتسامح بعد الاعتذار عن الخطأ ... علميه التسامح
8- مش لازم تبقى دراكولا وأنت بتستقبلي وبتحلي المشاكل ..عشان متربلناش دراكولا تاني ..اهدي شوية عشان تعلميه هدوء وحكمة التصرف ..ومتقبليش منه الصوت العالي في أي مشكلة ..وقوليله الستات مبنتكلمش معاهم كده حتى لو غلطانين
9- علميه يلبس لبس مهندم في البيت .. مش طول النهار قاعد بالفانيلة والبوكسر ... لقد أصبحت الفانيلة البيضاء أسلوب حياة الرجل المصري كأنه قاعد في مستشفى بيونيفورم
10- قوليله اختار مكان فسحني وأكلني ايس كريم ومشيني شوية ... مش أنت اللي تعمليله كده ...عشان يتعلم يعمل كده مع بنت الناس اللي هيعاشرها
11- علميه ان البيت عشان يشارك اللي موجودين في حياتهم ..خلي فيه حاجات مشتركة بتعملوها سوى حتى ولو تقطيع البطيخ ..عشان ميبقاش البيت بعد كده أكلة ونومة وقاعدة على النت ودمتم
12 _ علميه لما يلاقي نفسه متضايق يعمل حاجة يتخلض بيها من ضيقه (جيم - مشي - رياضة - لعبة - تليفزيون - بلاي استيشن ....) المهم ميطلعوش على اللي حواليه
13 -احضني ابنك وبوسيه ..ولما يكبر شوية ويقولك هاتي بوسة ولا يجي يعاكسك ولا يحضنك متقوليلوش امشي يا واد من هنا ... سيبيه يحضنك ويبوسك وانبسطي بتعبيراته ..متقفلهوش .. متقفلهاش للي جاية وراكي تعاشره
14- اسمعيه أما يتكلم وعلميه يسمع
15- أما يجيبلك طلبات ولا يعملك حاجة اشكريه عشان يستمر ...وقوليله لو كل الناس في حنيتك كده كانت الأمهات كلها بقم سعده ومبسوطين
16-بلاش الكلام عن أبوه بطريقة سلبية ولا تنمرية ولا استحلافية حتى لو مش طايقاه ومطلع عنيك.. بتكرهيه في الستات والجواز وسنينه
17- بلاش الحلفان المتحكم والمسيطر واللي أقوله لازم يتسمع ويتعمل ... بتربيلنا بسي سيد نكدي بالدرجة الأولى
18 - صبحيه بكلمة حلوة وعلميه يقول الكلمة الحلوة على الصبح
19- سيبيه يفرح وينبسط في البيت و افرحي معاه ..مش عيب ولا حرام على فكرة ..كفاية نكد
20- ألعبوا سوى ..وهو صغير وهو كبير ... اللعب مش حرام برضه ..عشان تعلميه يلعب مع أهل بيته

بلاش تربي رجل يبقى ابتلاء في حياة مراته وولاده
متخليش بنت الناس اللي هتتبلي بيه تدعي في يوم عليه وعلى اليوم اللي عرفته فيه وعليك
كفاية صوت عالي وزعيق وشخط وعصبية وخناقات ..ده أصبح طريقة وأسلوب الناس في التعامل في كل حتة وكل مكان وأصله تربية أم
الرقي والهاي كلاس أسلوب وطريقة تعامل مش مراكز ومناصب وبرستيج ( الحور  العين )