القرفة من المشروبات اللذيذة جدا ومن انواع التوابل اللي بتتحط على كتير من الاكلات والحلويات وبتديها طعم وريحة حلوة جدا لكن فوايد القرفة مش بس كمشروب او للأكل لكن هي ليها فوايد كتير جدا للبشرة لانها مليانة بالمواد المضادة للأكسدة وزي ما كلنا عارفين دي اد ايه مفيدة للبشرة, ده غير ان فيها مضادات للبكتيريا وللفطريات وحاجات كتير هنعرفها النهاردة مع بعض من خلال 13 وصفة من القرفة لجمال بشرتنا.
ياللا نبدأ مع بعض ونعرف 13 وصفة من القرفة لجمال بشرتك:
1- لوشن لعمل لون برونزي للبشرة:
احنا داخلين على الصيف وفي بنات كتير بيحبوا يعملوا برونزاج وياخدوا لون برونزي لبشرتهم, احنا النهاردة جيبنالكم وصفة تعمل لون برونزي طبيعي للبشرة.
المكونات:
– لوشن الجسم.
– قرفة.
– بودرة كاكاو.
– نشا.
طريقة التحضير:
ناخد كميات متساوية من القرفة والكاكاو وحطي كمية نشا على حسب اللون اللي انتي عايزة تعمليه, واخلطيهم مع بعض كويس,وجربي الخليط على بشرة ايدك وشوفي اللون لو عايزة تفتحيه اكتر زودي النشا, ولو عايزاه اغمق زودي الكاكاو لحد ما تظبطي اللون زي ما انتي عايزة, وبعدين ضيفي على الخليط لوشن الجسم اي نوع انتي بتستخدميه وقلبيهم كويس وسيبيه شوية عشان يمتزج كويس مع بعض وبعدين قلبيه تاني, وحطيه في اي ازازة عندك, واستخدميه في اي وقت لما تكوني عايزة تاخدي لون لبشرتك, ادهني بيه البشرة وسيبيه 20 دقيقة وبعدين اغسليه هتاخدي لون برونزي طبيعي جميل.
2- سكراب القرفة والقهوة للجسم:
السكراب ده بينشط الدورة الدموية, وبيخلص الجسم من مشكلة السيلوليت, وبيدي الجسم ريحة حلوة جدا.
المكونات:
– نص فنجان قهوة.
– نص كوباية سكر بني.
– تلت كوباية زيت جوز هند.
– معلقة صغيرة قرفة.
طريقة التحضير:
هندوب زيت جوز الهند على النار وبعدين نضيف عليه باقي المكونات ونخلطهم مع بعض كويس, افركي ايدك كويس عشان تديها حرارة وخدي من الخليط وافركي بيه الجسم بحركات دائرية قوية, وبعدين اغسلي جسمك, واحتفظي بباقي الخليط في اي برطمان عندك لحد ما تيجي تستخدميه تاني.
3- سكراب لتقشير الشفايف:
السكراب ده بيقشر الشفايف وبيعالج تشقق وجفاف الشفايف.
المكونات:
– سكر ابيض او بني.
– زيت جوز هند.
– شوية قرفة.
طريقة التحضير:
هنضيف السكر مع جوز زيت جوز الهند من غير ما ندوبه هنستخدمه زي ما هو ونضيف عليهم القرفة ونقلب الخليط كويس, خدي من الخليط بصوابعك وابدأي افركي بيه الشفايف, ولو عندك باقي من الخليط ممكن تحتفظي بيه في برطمان وتحطيه في التلاجة ممكن يقعد عندك اسبوعين, بس قبل الاستخدام طلعيه من التلاجة قبلها بخمس دقايق وبعدين استخدميه.
4- حمام القرفة والملح:
الحمام ده حلو جدا بيخلص الجسم من التعب والارهاق بعد يوم طويل مرهق.
المكونات:
– كوباية ملح انجليزي.
– نص كوباية ملح البحر.
– تمن معلقة جلسرين.
– من 2 ل 4 نقط من زيت الليمون زيت القرفة وزيت اكليل الجبل ” كل الزيوت هتلاقوها عند العطار”.
طريقة التحضير:
نخلط المكونات كلها مع بعض كويس, ونحط من الخليط ده في الحمام بتاعنا املي البانيو مية سخنة وحطي فيه من الخليط واقعدي استرخي فيه, وباقي الخليط ممكن تحتفظي بيه في اي برطمان لاستخدام تاني.
5- ملمع شفايف القرفة:
الملمع ده بيدي لون وردي طبيعي حلو جدا للشفايف وبينفخها.
المكونات:
– روج احمر.
– فازلين.
– زيت لوز حلو.
– زيت القرفة.
طريقة التحضير:
هنحط معلقة فازلين كبيرة ونضيف عليها حته من اي نوع احمر شفايف عندك ونحطها في الميكرويف 30 ثانية عشان ندوبهم وبعدين نضيف عليهم كام نقطة من زيت اللوز و 5 نقط من زيت القرفة, ونخلطهم كويس مع بعض وكده يبقى الملمع جاهز عندنا حطيه في اي برطمان صغير عندك واستخدميه على شفايفك.
6- مقشر القرفة للجسم:
المقشر ده هايل جدا بيساعد على تجديد الجلد وبيقشره وبيخلصك من الجلد الميت وبيفتح البشرة والاماكن الخشنة والغامقة من الجسم زي الركب والكوعين.
المكونات:
– نص كوباية قرع مهروس.
– نص كوباية سكر بني.
– معلقة كبيرة من زيت الجوجوبا وزيت اللوز الحلو او زيت الزيتون.
– ربع معلقة صغيرة قرفة مطحونة.
طريقة التحضير:
اخلطي المكونات كلها مع بعض كويس وخدي شاور سخن عشان تفتحي مسام البشرة ونشفي جسمك كويس اوي وبعدين افركيه بالخليط بحركات دائرية وركزي على المناطق الخشنة والغامقة وبعدين اغسلي جسمك بالمية عادي.
7- تبييض السنان بالقرفة:
الخلطة دي من الحاجات الفعالة جدا لتبييض السنان.
المكونات:
– 4 معالق كبيرة بيكنج صودا “كربوناتو”.
– 4 معالق كبيرة زيت جوز هند.
– 2 معلقة كبيرة من بيروكسيد الهيدروجين ” مية الاكسجين موجودة في الصيدلية”.
– 10 نقط زيت قرفة.
– 10 نقط زيت قرنفل.
طريقة التحضير:
نخلط المكونات كلها مع بعض كويس ونحطها في اي برطمان عندنا ونستخدمها نفرك بيها السنان من مرتين لتلات مرات في اليوم او حسب الحاجة, حطي الخليط على فرشة السنان وافركيهم كويس.
8- القرفة لعلاج حب الشباب:
القرفة من الحاجات المفيدة جدا في علاج حب الشباب لانها زي ماقولنا فيها مواد مضادة للأكسدة ومضادات للبكتيريا وبتجدد خلايا البشرة وبتنشط الدورة الدموية وبتساعد في علاج حب الشباب والبقع اثار حب الشباب.
المكونات:
– 2 معلقة كبيرة عسل نحل.
– معلقة كبيرة قرفة مطحونة.
طريقة التحضير:
نخلط العسل والقرفة مع بعض كويس اوي وبعدين نسيبهم ربع ساعة عشان يمتزجوا مع بعض كويس, ونجربه الاول على جزء صغير من البشرة عشان نتأكد ان بشرتنا مش حساسة من الخليط وبعد ما نتأكد ندهن الخليط على بشرتنا ونسيبه نص ساعة وبعدين نغسله.
9- زيت للجسم ومزيل للمكياج:
الزيت ده بيرطب البشرة جدا وبيجددها وبيخلي البشرة صافية ومنورة.
المكونات:
– ازازة صغيرة زيت لوز حلو.
– ربع كوباية شاي اسود.
– عيدان فانيليا “موجودة في الهايبر ماركت”.
– كام حبة قرنفل وحبهان وعيدان قرفة.
طريقة التحضير:
سخني زيت اللوز شوية على نار هادية وبعدين ضيفي ليه باقي المكونات وهو على النار وسيبيهم ساعة على نار هادية اوي وبعدين ارفعيه من على النار وسيبيه يبرد, صفيه وحطيه في اي ازازة او برطمان عندك وممكن تحطي جوه البرطمان من التوابل اللي احنا استخدمناها وتحتفظي بيه في مكان ضلمه وبارد وممكن تقعد معاكي كذا شهر عادي مش هيحصلها حاجة, واستخدميه بعد الحمام ادهني بيه جسمك كله هيرطب البشرة وينعمها جدا, وكمان ممكن تستخدميه كمزيل للمكياج.
10- ماسك القرفة والشاي الاخضر:
الماسك ده بيرطب البشرة جدا وبيجددها
– معلقة كبيرة شاي اخضر.
– معلقة صغيرة عسل نحل.
– شوية قرفة صغيرين.
– نص معلقة كبيرة مية مغلية.
– 5 نقط زيت خشب الصندل ” من عند العطار”.
طريقة التحضير:
نطحن الشاي الاخضر ونضيف عليه العسل والقرفة ونضيف المية المغلية واحدة واحدة لحد ما يبقى سمكه معقول, ونحط الخليط على البشرة ونسيبه 20 دقيقة وبعدين نغسله.
11- ماسك القرفة لتقشير البشرة وعلاج حب الشباب:
الماسك ده بيعمل تقشير عميق للبشرة وبيعالج حب الشباب.
المكونات:
– 3 معالق كبيرة بذور كتان ” من عند العطار”.
– ربع كوباية زبادي.
– معلقة صغيرة قرفة مطحونة.
– معلقة صغيرة عسل نحل.
طريقة التحضير:
اخلطي المكونات كلها مع بعض كويس وادهنيها على بشرتك وسيبيها لمدة 10 دقايق وبعدين اغسلي البشرة بمية دافية.
12- شامبو جاف بالقرفة:
هو مفيد للبنات اللي شعرهم دهني اوي فبدل ما تغسلي شعرك باستمرار ممكن تعمليه بالشامبو الجاف ودي طريقة للشامبو الجاف بالقرفة.
المكونات:
– ربع كوباية نشا.
– 2 معلقة كبيرة كاكاو.
– 4 نقط زيت قرفة.
طريقة التحضير:
هنخلط النشا مع الكاكاو ونقلبهم كويس, لو انتي شعرك فاتح ممكن تقللي من الكاكاو ولو شعرك غامق زودي الكاكاو عادي, وبعد كده هنضيف زيت القرفة ونخلطهم مع بعض كويس وكده يبقى الشامبو عندنا جاهز نحتفظ بيه في اي برطمان لحد ما نيجي نستخدمه, هنجيب فرشة كبيرة ونحط بيها من الشامبو بتاعنا على فروة الراس وبعدين نسرح الشعر بفرشة الشعر العادية عشان نوزعه على باقي الشعر.
13- كريم اساس بودر:
دلوقتي في كتير من ماركات المكياج عملوا كريم الاساس البودر او اللي بيتقال عليها بودرة معدنية دي بتجمع ما بين البودرة وكريم الاساس, النهاردة هنقولكم طريقة عشان نعمل البودرة دي في البيت.
المكونات:
– ربع كوباية نشا.
– 4 معالق كبيرة كاكاو.
– معلقة صغيرة قرفة مطحونة.
– ربع معلقة صغيرة جوزة الطيب مطحونة.
– ربع معلقة صغيرة زنجبيل مطحون.
– 2 معلقة صغيرة من طين البشرة ” من عند العطار”.
– 10 نقط من فيتامين E.
– 12 نقطة من زيت اللافندر.
طريقة التحضير:
هنخلط المكونات كلها مع بعض في اي حاجة بس متكونش معدنية يعني ممكن بلاستيك ونقلبهم كويس مع بعض وبعدين نحتفظ بيها في اي علبة عندنا, وكده تبقى البودرة جاهزة عندنا ونستخدمها على الوش عادي بالفرشة. ( الحور العين )
