ازاي تعرفي شعرك ايه

( الحور العين ) هتعرفك معلومات مهمه عن شعرك 

البوست دة مهم جدا فياريت نركز فيه شوية لكل بنات الحور العين

كتير مننا بيشتري زيوت وكريمات بيتقال عليها جميلة وكتير بيشكروا فيها وتيجي تجربيها تلاقيها معملتش حاجة
و ف الحقيقة الحاجات دي مش وحشة هي بس مش مناسبة لشعرك ! وعشان نعرف اييه مناسب لينا لازم نعمل اختبار "مسامية الشعر"

طب يعني ايه مسامية الشعر ؟؟

معناها قدرة الشعر على امتصاص المرطب

 والاحتفاظ بيه، وغالبا مسامية الشعر بيبقي حاجة وراثية بس ممكن الكيميائيات والحرارة تأثر عليه وتحوله من درجة مسامية منخفضة لمسامية أعلى.

هنعمل اختبار مسامية الشعر ازاي؟؟

نأخذ شعرة من الفرشاة او المشط ونحطها ف نص كوباية ماية ونراقبها من دقيقة ل 4 دقايق
 (الاختبار دة لازم نعمله و الشعر نظيف مش عليه اي زيوت او كريمات)

• لو الشعرة طافية على السطح هتكون مسامية الشعر منخفضة
 يعني الشعره ممتصتش الماية ففضلت فوق.

• لو اخدت وقت عشان تغرق او فضلت في النص معناها ان مساميتها متوسطه.

• لو غرقت الشعرة ونزلت تحت خالص هتكون مساميتها عاليه لأنها اتملت ماية.

ايه الفايدة اننا نعرف مسامية الشعر؟

الطريقة دي هتساعدك كتير ف انك تعرفي ازاي ترطبي شعرك وايه انواع الزيوت المناسبة ليه

*في نقطة مهمة هي أن المرطب الأساسي للشعر هي الماية زي م بنعطش ونحتاج نشرب..الشعر كمان بيحتاج يشرب
 ف مهم جدا اننا بعد الشاور نحط زيت يحبس الماية جوة الشعراية عشان تفضل مترطبة

هتكلم بقي عن انواع مسامية الشعر بالتفصيل..

الشعر منخفض المسامية:

عشان الغلاف الخارجي للشعرة مسطح ومحكم بدرجة كبيرة النوع دة بيكون مقاوم للرطوبة ومقاوم لاختراق المنتجات داخل الشعرة..
وعادة النوع دة من أنواع الشعر بيكون صحي .. بس مفهوش مرونة  .. وصعب ترطيبه عشان مسامات الشعرة صغيرة جدا ف صعب ان المنتجات تخترقه وف نفس الوقت صعب خروج المرطب منه

ازاي نهتم بالشعر اللي مساميته منخفضة؟؟

 • ممكن نستخدم الحرارة المعتدلة وتكون مش مباشرة عشان نفتح مسامات الشعر عشان يقدر يمتص المنتج المرطب

 وكمان الترطيب بعد الشاور بماية دافية بيساعد الشعرة على الامتصاص لان المسامات بتكون لسة مفتوحه..

 وكمان البخار للشعر مفيد لاستقبال المنتجات

• الزيوت المفضلة للنوع دة هي الزيوت الخفيفة اللي سهل علي الشعرة امتصاصها.
 زي : زيت الارجان، زيت الجوجوبا ،زيت الأفوكادو

• ممكن نستخدم الحنة كل 8 اسابيع من فترة لأخرى مفيدة للشعر

نتجـنـب:
• المنتجات اللي فيها سيليكون وزيوت معدنية.
• الزيوت الثقيلة زي زيت الخروع لأنها هتفضل علي غلاف الشعرة ومش هتستفاد بيها
 • العلاجات اللي فيها بروتين عالي لانه بيتراكم ع الشعره.. ويسبب قساوة للشعر.. فنستخدم بلسم خالي من البروتين أفضل.. ويفضل ان تكون العلاجات البروتينة كل 8 أسابيع..

الشعر متوسط (طبيعي) المسامية :

-الشعر دة بيمتص المرطبات وبيحافظ عليها بصورة جيدة.. المفروض علينا نعرف ازاي نرطبه بكمية مناسبة ونحافظ على عدم تبخر الرطوبة من الشعر..

-وهو أكثر نوع بيمتص لون الصبغة ويحتفظ به..

 -وأكثر نوع يحافظ على طريقة تسريحك ليه يعني مثلا لو عملتيه ويفي أو كيرلي هيحافظ ع هيأته لوقت طويل مقارنة بالأنواع الأخرى

ازاي نهتم بالشعر اللي مساميته متوسطة (طبيعيه)؟؟

• نستخدم المنتجات اللي فيها بروتين كل 8 أسابيع او 6 ومنستخدمهاش كل يوم

زي زيت جوزالهند وزبدة الشيا

 • نرطبه كل يوم بزيوت خفيفة زي زيت الأرجان و الجوجوبا

نـتـجنب:
• الحرارة والكيميائيات قدر الامكان عشان ميتحولش لشعر عالي المسامية.
 • كتر استخدام المنتجات اللي فيها بروتين

الشعر عالي المسامية :

-الشعر دة فيه ثغرات وثقوب كتير في غلافه الخارجي، ممكن يكون الموضوع دة جيني.. او بسبب ان الشعر تضرر من كثرة الحرارة العالية وتراكم منتجات التجميل عليه..

يعني ممكن يكون شعرك منخفض المسامية ومتوسط ويتحول للنوع دة مع الاهمال..

 -النوع دة بيكتسب المرطب ويفقده بسرعة عالية.. يعني شعرك بيكون عرضة للتجعد في الجو الرطب لانه هيمتص الرطوبة بكمية كبيرة فيسبب تجعد الشعر..

 -وحتى الاستحمام الكتير والسباحة ممكن تضره لانه بيمتص كمية عالية من الماء فتسبب تكسره وضعفه..

 لازم نعرف ازاي نخليه يحتفظ بالرطوبة داخله، لأنه بيفقدها بسرعة جدا فبيصبح جاف

ازاي نهتم بالشعر اللي مساميته عالية؟؟

• يشطف بالماء البارد.

• استخدام الزيوت اللي فيها بروتينات زي جوزالهند مرة مل أسبوع

 • استعمال بلسم الشعر المحتوي على بروتين.. لأن استخدام البروتين بيساعد في الملئ المؤقت للفراغات الموجودة فيه.. بالتالي يقوي الشعر ويساعد على التخفيف من تكسره.

 • استخدام الزيوت التقيلة والزبدة لترطيب الشعر.. زي زيت جوزالهند و زيت الخروع وزبدة الشيا لأنها بتعمل حاجة زي حاجز واقي حولين الشعرة و تمنع تبخر الماء من الشعر.

• استخدام الحنة مفيد في ملئ الفجوات والحصول على شعر صحي.. يستحسن استخدامها كل  8 أسابيع.

• استخدام منتجات درجة الـPHH فيها منخفضة.. يعني تميل للحموضة.

أستخدام ملعقة من خل التفاح مع ماء الشطف دة بيساعد على تسطيح الغلاف الخارجي للشعرة وتصغير المسام وبالتالي الحفاظ على الرطوبة.

نتجنـب:
• الحرارة المباشرة
 • أملاح السلفيت والمواد الكيميائية القاسية

جربوا الأختبار ده و اعرفوا نوع مساميه شعركوا و اهتموا بيه ( الحور العين )