تعالي اعرفي وصفات مفيدة لتهدئة الـ T-Zone

( الحور العين ) هتعرفك وصفات مفيدة لتهدئة الـ T-Zone

على الرغم من انه الجو لسه ساقعه وفى الجو ده بتميل البشرة الى انها تقلل من افراز الزيوت وعلشان كده بنحتاج نرطبها ونهتم بيها بشكل خاص خلال الشتا، لكن كمان فى مننا بشرتهم بتستمر فى افراز الزيوت طول الوقت بغض النظر عن الجو، وده بيخلى البشرة حساسة زيادة ومتعرضة لظهور الحبوب والاصابة بالاتهابات خصوصا الزيوت اللى بتفرزها البشرة فى منطقة الـ T-Zone ” الجبهة وخط الأنف”. علشان كده فى المقال ده هنقولك على 5 حيل و وصفات مفيدة لتهدئة الـ T-Zone خصوصا لو كنتى من اصحاب البشرة الدهنية ،تحافظى بيهم على صحة وجمال بشرتك طول الوقت.

1- أغسلى وشك مرات أقل :
مش معنى انك من أصحاب البشرة الدهنية انك تغسلى وشك كتير وبشكل مستمر، حاولى تغسلى وشك مرات أقل خلال اليوم يعنى كفاية مرة اومرتين لانه اكتر من كده هيسبب هيجان البشرة وده ممكن يخليها تفرز زيوت أكتر، ومهم كمان تتجنبى منظفات البشرة اللى بيبقى أساسها كحول.

2- ابعدى عن المنتجات اللى بتسبب جفاف البشرة :
المنتجات اللى بتقابلك مخصوصة للبشرة الدهنية فى اوقات كتير بيبقى استخدامها غلط لانها بتسبب جفاف البشرة بشكل كبير وده هيتسبب فى انه بشرتك هتفرز كمية أكبر من الزيوت علشان تعادل كمية الزيوت الطبيعية اللى فقدتها بسبب استخدام المنتجات دى. الاحسن تستخدمى منتجات تضييق المسام اللى هتساعدك تقللى افراز بشرتك وخصوصا منطقة الـ T-Zone للزيوت من غير ما تسبب اى جفاف.

3- اعملى ماسك :

اعملى ماسك سريع لبشرتك باستخدام معلقة من جيل الالوفيرا و معلقة من عسل النحل و معلقة من الزبادى، امزجى المكونات دى مع بعضها و افرديها على منطقة الـ T-Zone و سيبيه من 15 لـ 20 دقيقةوبعدين اشطفى وشك. و بما انه اصحاب البشرة الدهنية بتبقى بشرتهم بطبيعتها حساسة اعملى الماسك ده مره او مرتين على الأكتر فى الاسبوع.

4- اعملى تقشير للبشرة مرات أقل : 

التقشير هيساعدك تفتحى المسام المقفولة و تتخلصى من طبقة الجلد الميتة، لكن لما تبقى منطقة الـ T-Zone عندك من النوع الدهنى ده بيخلى بشرتك تبقى ميالة لانها تبقى حساسة زيادة، علشان كده لو بتعملى تقشير كل يوم ده هيسبب احمرار البشرة و ظهور الحبوب. حاولى تستخدمى مقشر للبشرة يكون رقيق او ادهنى وشك بزيت جوز الهند وامسحيه بقطعة شاش مرتين فى الاسبوع ، ده هيخلى بشرتك تبقى نقية وصافية من غير ما يسببلها اى ارهاق.

5- رطبي بشرتك بشكل يومى :

مش معنى انه بشرتك دهنية انك ماتهتميش بترطيبها، بالعكس أصحاب البشرة الدهنية لازم يحافظوا على ترطيب بشرتهم طول الوقت لانه جفاف البشرة هيخلى بشرتك تفرز كمية اكبر من الزيوت علشان تحافظ على معدل الترطيب الطبيعى فيها وده هيخلى بشرتك تبقى دهنية أكتر، مهم تستخدمى مرطب للبشرة اساسه مائى بشكل يومى. ( الحور العين )

عرض مزيد من التفاعلمشاركة