تعالي اعرفي ايه هيه المشروبات الصحيه للفطار

( الحور العين ) هتعرفك المشروبات الصحيه للفطار :

اكيد مافيش خلاف ان الفطار هو اهم وجبة في اليوم لانه هي الوجبة اللي بتدينا طاقة لباقي اليوم, لكن مش وجبة الفطار بس هي المهمة كمان اختيار المشروب هو بنفس اهمية اللي هتاكلية, لان الجسم بيحتاج لترطيب بعد فترة النوم والمشروب كمان هيهيء الجسم للاكل, والنهاردة هنقولكم على قايمة فيها مجموعة مشروبات صحية للفطار الافضل انك تبدأي بيها يومك.

1- المية:

المية من اكتر الحاجات الصحية اللي هيكون مفضل تبدأي بيها يومك, اولا المية خالية تماما من السعرات الحرارية وبتلعب دور مهم في تقليل آلام العضلات والمفاصل, كمان بيعزز الايض او عملية التمثيل الغذائي في الجسم وممكن تخليها فعالة اكتر لو ضيفتي لها شرايح ليمون طازة.

2- عصير الفاكهة:

عصير الفاكهة من الحاجات المفيدة جدا اللي ممكن تبدأي بيها يومك لانه غني جدا بالفيتامينات المهمة لصحة الجسم, ولو عايزة سعرات حرارية اكتر تبدأي بيها يومك ممكن تضيفي لعصير الفاكهة اللي هتختاريه بذور الكتان, او الزبادي قليلة الدسم, وده هيديكي تقريبا 185 سعر حراري, و8 جرام الياف, و5 جرام دهون غير مشبعة, و6 جرام بروتين, و17% من الكالسيوم اللي بيحتاجه الجسم بشكل يومي.

3- النعناع:

مشروب النعناع او شاي النعناع من المشروبات المفيدة جدا اللي ممكن تبدأي بيها يومك لتخفيف التقلصات وعسر الهضم, وكمان مضاد للتشنج, وبيساعد الجسم يكون اقوى وبيتحمل اكتر لو بتمارسي تمارين رياضية, والميزة انه خالي من السعرات الحرارية وبيعزز حركة الطعام وده بالتالي بيحسن عملية الهضم.

4- عصير البرتقان:

عصير البرتقان غني جدا بفيتامين سي ومضادات الاكسدة, وكوباية من عصير البرتقان على الفطار ممكن تحمي الجسم من السرطان, وتحسين النظر, وفيتامين سي بيمنع الضرر التأكسدي اللي ممكن يسبب السرطان, وبيحسن من وظيفة الخلايا المناعية, وبيخليكي جسمك عنده مناعة اقوى للامراض او اي عدوى, كمان يعتبر مصدر لحمض الفوليك, وكوباية عصير البرتقان بتحتوي تقريبا على 115 سعر حراري بس.

5- مشروب الفلفل الاحمر:

المشروب ده بشكل خاص للي بيحبوا التوابل والحاجات الحراقة, لو عايزة تخسي وتخسري وزن بشكل اسرع ضيفي شوية من الفلفل الاحمر “الشطة” لاي مشروب انتي بتشربيه على الفطار يعني ممكن تضيفي لاي عصير, ده بيعزز الايض اللي هي عملية التمثيل الغذائي اللي بتساعد على فقدان الوزن, وكمان بيطهر القولون وده بيساعد في تنظيم وزن الجسم.

6- عصير الطماطم:

عصير الطماطم كمان واحد من المشروبات الصحية اللي ممكن تشربيها على الفطار, كوباية واحدة من عصير الطماطم غنية جدا بعنصر الليكوبين, والمواد المضادة للاكسدة اللي بدورها بتقلل من خطر الاصابة بمرض السرطان, كمان بتحمي القلب والرئتين من التلف التأكسدي, وهتبقى مفيدة جدا للي حابين يخسروا وزن لان كوباية عصير الطماطم بتحتوي على 31 سعر حراري بس.

7- لبن قليل الدسم:

كوباية من اللبن بتحتوي على 120 سعر حراري لكن كمان بتمد الجسم بالدهون اللازمة والبروتين والكربوهيدرات اللي بيحتاجها جسمك عشان يفضل في صحة كويسة, وكوباية واحدة من اللبن الصبح كافية انها تقلل رغبتك في الاكل او تسيطر على شهيتك لانه غني بالكربوهيدرات والبروتين اللي الجسم بيمتصها ببطء وبالتالي معدتك بتفضل مليانة لفترة طويلة, وطبعا اللبن معروف انه من الحاجات المهمة جدا لصحة العضم لانه بيمد الجسم بالكالسيوم, ومفيد كمان انه بيحافظ على استقرار نسبة السكر في الدم.         ( الحور العين )