ازاي تتخلصي من الخجل في المناسبات الاجتماعيه

( الحور العين ) اعرفي نصايح للتخلص من الخجل في المناسبات الاجتماعية

كتير من البنات بيعانوا من مشكلة الخجل خصوصا في المناسبات الاجتماعية المختلفة او الاماكن اللي فيها تجمعات يعني لو اتوجهت لك دعوة لمناسبة او خروجة مع مجموعة دايما بتبقي قلقانة هل هتعرفي تتصرفي كويس هتعرفي تتكلمي ولا هتفضلي ساكتة, والموضوع ده بيعاني منه كتير مننا, عشان كده النهاردة جايبنلكم نصايح للتخلص من الخجل بطرق وحيل بسيطة جدا بس هتساعدك يبقى عندك ثقة اكتر في نفسك.

1- عيدي صياغة افكارك:

لو موجودة في مكان حواليكي ناس كتير او معزومة في مناسبة متقعديش تفكري بشكل سلبي وتقولي مثلا “انا باين عليه اني محرجة” او “مافيش خد بيتكلم معايا” كل الافكار دي هتخلي الوضع يسوء اكتر وهتخليكي تحسي بخجل اكتر, يعني مثلا مش معنى انك محرجة يبقى تفتكري انه باين عليكي او كل اللي حواليكي ملاحظين بالعكس ممكن يكونوا اللي حواليكي عصبيين وقلقانين اكتر منك, عشان كده حاولي تتحدي نفسك وتفكري بشكل ايجابي بدل التفكير السلبي ده هيخليكي تحسي بثقة في نفسك.

2- ادخلي المكان وانتي مبتسمة:
وانتي داخلة المكان ابتسمي ابتسامة بسيطة ده هيدي اشارة للدماغ انك سعيدة حتى لو مش مرتاحة او حاسة بتوتر وعلى قد بساطة الحيلة لكن فعالة جدا, جربيها هتحسي انك مبسوطة ومرتاحة وعندك ثقة في نفسك اكتر.

3- اختاري اسهل مكان للوقوف فيه:

لو معزومة في مناسبة حاولي تقفي حوالين المكان اللي فيه البوفيه, دي هيديكي مجال لفتح حديث مع الناس وكمان ساعة الاكل بيرتفع هرمون الاندروفين وده بيخلي اللي حواليكي في حالة مزاجية حلوة وفي مود احسن, والاكل هيخليكي تعملي حاجة وهيبقى وسيلة تحاولي تهربي بيها من احساس الخجل.

4- المجاملة:

اكيد المجاملة والكلمات اللطيفة بتخلينا نحس باحساس احسن ونبقى مبسوطين وبترفع معنوياتنا, حاولي تجاملي اللي حواليكي وتقولي لهم كلمات حلوة, المجاملة وسيلة للتعبير عن الامتنان والشكر للي حوالينا, يعني مثلا اشكري صاحبة الدعوة انها دعيتك, اشكري في تنظيم الحفلة يعني حاولي تكوني لطيفة مع اللي حواليكي.

5- ازاي تقولي المجاملة:

لو شوفتي حاجة عجبتك بكل بساطة ممكن تقولي “واو” او ” الله حلوة اوي” او “حبيت اللون ده عليكي جدا او لايق عليكي” او “قصة شعرك حلوة ولايقة عليكي اوي”.

او ممكن تقولي مجاملة بشكل اكبر وتمدحي في شخصية اللي قدامك او تقولي ايجابيات فيه, المجاملة وسيلة ممتازة جدا لكسر الجليد وهيخليكي تحسي براحة اكتر في المكان وهتديكي مجال تفتحي حديث مع اللي حواليكي.

6- الاحاديث البسيطة:
كتير مننا ممكن يشوف الحديث البسيط ممكن يكون ممل يعني مثلا انك تكلمي حد تسأليه عن اخباره وبس ومافيش مجال للحديث اكتر من كده, لكن بالعكس الاحاديث البسيطة دي بتمهد الطريق وبتفتح مجال لمعرفة وصداقة اعمق واطول مع الوقت يعني حاولي تتواصلي مع اللي قدامك بحوار بسيط وعام وكل الناس ممكن يكونوا بيحبوه زي الاكل او الافلام او برامج التليفزيون.

ومع الوقت حولي الاحاديث البسيطة لاحاديث اكبر بانك تسألي اسئلة مفتوحة يكون الرد عليها محتاج من اللي قدامك انه يقعد يحكي تفاصيل بدل ما تسألي اسئلة اجابتها تكون بايوة او لا او بكلمة واحدة بس.

7- كلمات ممكن تستبدليها بكلمات تانية:
– بدل ما تسألي مثلا يومك كان عامل ازاي قولي ايه افضل او احسن حاجة حصلت معاكي النهاردة.
– لو بتقابلي حد من بلد تانية بدل ما تقولي له انت من اي بلد اساليه مثلا ايه اغرب حاجة موجودة في بلدك.

– بدل ازيك واخبارك وعاملة ايه والكلام التقليدي ده اسألي مثلا عن المطعم – الكتاب – الفيلم المفضل – ايه البرنامج اللي متقدريش تفوتيه ومتتفرجيش عليه يعني سؤال يفتح مجال حديث.
وفي النهاية لما تتخلصي من خجلك ممكن يكونوا الاشخاص دول بعد كده هما اصدقاء العمر وتبقي كسبتي صداقات, يعني حاولي متفوتيش فرصة على نفسك انك تتعرفي على ناس جديدة وتكوني صداقات وعلاقات. ( الحور العين )