حللي شخصيتك من نوع القهوه الي بتحبيها

( الحور العين ) هتقولك ازاي تعرفي شخصيتك من نوع القهوه الي بتشربيه :

تقريبا مفيش حد فينا مبيحبش القهوة ، مش بس لانها ضرورية فى يومنا و لازم الصبح نشرب قهوة علشان نصحصح و نقدر نكمل اليوم ، و لكن لان القهوة كتير بتبقى هى الحاجة اللى محتاجينها علشان نعدل مزاجنا ونستمتع بوقت معين فى اليوم و يا سلام لو معاها مشغلين المزيكا اللي بنحبها، عشان كده فيه دراسة اتعملت هتورينا القهوة ممكن تقول ايه عن شخصية كل واحد فينا ، فى المقال ده هتعرفى معانا نوع شخصيتك من نوع القهوة اللى بتحبيها واختيارك للقهوة بيقول ايه عنك !

1- القهوة التركى و الاسبريسو :
محبين القهوة التركى و القهوة الاسبريسو بيميلوا للبساطة والجو الكلاسيك فى حياتهم عموما. مش بمعنا انهم قدام فى اختيارتهم لكنهم بيميلوا للهدوء و البعد عن الدوشة فى كل امورهم خاصة فى اختيار الملابس و بيميلوا للستايل الكاجوال و الستايل الكلاسيك، و كمان عقلانيين جدا فى قرارتهم . معروفين بالتزامهم و لما بيلتزموا بحاجه صعب اقناعهم يسيبوها ، ممكن يبقوا نقاد و صعب يسامحوا الناس على ضعفهم ، لكن مخلصين جدا لاصحابهم و عندهم استعداد يعملولهم اى حاجه .

2- القهوة السادة :
عندهم قدرات ذهنية ممتازة و مبدعين ، و بيقدروا يشوفوا الحلو و المختلف فى اى حاجه .

3- الكابتشينو :
محبين الكابتشينو رومانسيين وحالمين بطبيعتهم، حساسين جدا واحيانا زيادة عن اللزوم لكن بيقدروا مشاعر الناس من حواليهم . بيقدروا الصدق و الاخلاص فى اصحابهم و مبيرفضوش انهم يناقشوا اى حاجه جواهم ، و دايما بيختاروا شغل فيه مساحه من الابداع و اللى بيبقى ليه علاقة بعلم النفس او الثقافة، لانهم بيبقوا مهتمين جدا يعرفوا الناس و يفهموهم.