طريقه تداري بيها الهالات السوده بواسطه االروج

( الحور العين ) هتقولك حيلة احمر الشفايف لمداراة الهالات السودة

زهقتي من الهالات السودة تحت العين؟ أو الاكياس المنفوخة؟ يبقي أكيد بتستعملي كونسيلر عشان تداري بيها الهالات, بس مشكلة الكونسيلر انه الوانه كتير ومش علي طول متوفر اللون اللي بنحتاجه عشان كده اوقات بتبقي حطاه بس بيبان لونه مش طبيعي مهما تحاولي تجيبي لون قريب من لون وشك بس برضه الفرق بيبان وكمان الاكياس اللي تحت العين مش علي طول بتتداري بالكونسيلر..

في ألوان مختلفة للكونسيلر غير اللون البيج ال natural اللي بيبقي قريب من لون الجلد, طيب ايه أحسن لون ينفع عشان الهالات السودة؟؟ لو ركزنا شوية في لون الهالات هنلاقي إنها لونها بيبقي اميل للموف أو الازرق وخريطة ألوان الكونسيلر اللي تحت بتقولنا إننا نختار لون الكونسيلر يعادل لون المشكلة اللي في بشرتنا وبيبقي عكسها .. عشان كده أحسن اختيار للهالات هيبقي الكونسيلر البينك أو الخوخي أو البرتقالي لانه بيدي شكل طبيعي للهالات وبيشيل الزرقان و العروق وزي ما شايفين في الخريطة هو بيعادل الألوان الزرقة اللي غالبا بيبقي لون هالات تحت العين. 

من هنا خبراء المكياج اللي مش بيبطلوا حيل وأفكار جديدة جربوا الحيلة السهلة ديه انهم بدلوا استعمال الكونسيلر بالالوان البرتقالي أو البينك جربوا انهم يعملوا تجربة بإستعمال قلم روج… ايوه قلم روج :) والتجربة كانت ناجحة جدا.. تعالوا نشوف

الطريقة:

1- أول خطوة هي اختاري اللون اللي يليق علي لون بشرتك, وبعدين استعملي فرشة ايشادو وحطيها في احمر الشفايف وبعدين املي بيها كل المنطقة الغامقة حوالين عينك وأي منطقة تانية في وشك. لو معندكش فرشة ممكن بأيدك, بس هي الفرشة أحسن عشان انعم علي البشرة وهتوزع الروج أحسن.
● البشرة الفاتحة:اختاري لون أحمر وردي.
 ● بشرة متوسطة أو قمحية: اختاري  الأحمر الأرجواني.
 ● البشرة السمرة:اختاري لون احمر برتقالي.

2- ابدأي حطي طبقة الكونسيلر زي ما إنتي متعودة وحطيها فوق لون احمر الشفايف عدي جدا , ويا ريت تستعملي اسفنجه وتفضلي توزعي الكونسيلر لحد لما يغطي لو الروج خالص… هتلاقي وإنتي بتمزجي الكونسيلر العادي بتاعك لونه هيتحول كأنه الكونسيلر البرتقالي أو البينك اللي هو افضل لون عشان يعادل لون الهالات اللي تحت العين.

3- بعد ماتخلصي توزيع الكونسيلر استعملي البودر بتاعتك ويا ريت يكون لونها قريب من لون بشرتك الطبيعي.

هتتفاجئي بالنتيجة, إن اللون هيبان طبيعي جدا, مش فاتح زيادة عن اللزوم ومخبي كويس قوي الهالات والانتفاخات أو الاكياس اللي بتبقي تحت العين. وهيخلي وشك مشرق وناعم.  ( الحور العين )